Euskaraz Jolasten Topaketaren ondorioak

Ekitaldia ikasleekin landutako proiektuaren amaiera izan da, proiektuen erakusketa egiteko eguna, alegia. Landutako gaia euskararen erabilerari lotuta egon denez, Euskararen Nazioarteko Egunarekin lotzea pentsatu dugu, klasean egindako lanak gelatik kanpo zabaltzeko aitzakia harturik.

2022/2023 ikasturtean, kasu honetan ere Euskara Errektoreordeak lagundurik, hizkuntz paisaia euskaratzeari lotutako proiektu bat gauzatu genuen (esteka honetan dago informazio zehatza: https://www.ehu.eus/ehusfera/komunikatzen/2023/01/29/hizkuntz-paisaiaren-saturazioa-eta-elebitasuna/). Orduan, konturatu ginen ikusizko paisaian eragiteaz gain, entzutezko paisaian ere eragin beharko genukeela. Izan ere, estrategikoa da Haur eta Lehen Hezkuntzako graduko 1. mailako ikasleek hasieratik euskara erabiltzeko kontzientzia garatzea, baina ikasle asko dira euskara soilik jarduera akademikoetarako erabiltzen dutenak. Gela berean, ikasle asko dira euskara hutsez bizi direnak.

Euskara erabiltzen ez duten hainbat ikaslek komunikazio antsietatea bizi dute, lehen aldia delako euskara hutsean bizi diren ikasleekin elkartzen direla. Euskara ia beti erabiltzen duten hainbat ikaslek hizkuntz estresa bizi dute, ikasgelatik kanpo gaztelania erabiltzeko presioa sentitzen dutelako.

Arazo konplexu honetan, jarduera konplexuak eta anitzak garatu behar ditugu, bai ikasgelan, bai ikasgelatik kanpo. Horrez gain, euskararen aktibista diren Haur eta Lehen Hezkuntzako maisu-maistrak ezagutu behar dituzte, beren etorkizuneko egoera profesionalaz jabetzeko.

Horregatik, antolatutako ekitaldian bi jarduera-mota egin ditugu: ikasleen lanen poster erakusketa azaldua eta bi hitzaldi: Nora Salbotx eta Mitxel Elortzarenak. Esteka honetan, ekitaldiaren zehaztasun guztiak kontsulta daitezke, baita bi ponenteen inguruko xehetasunak ere.

Ekitaldi aurreko astean, euskararen aldeko hainbat txartel prestatu genituen, fakultatean jartzeko. Horrela, azaroaren amaieran eguna girotzen hasi ginen.

 

Poster erakusketari esker, abenduaren 3ko eguerdi-arratsaldean euskara hutsa entzun da gure ikastetxean barrena. Poster batzuk korridoreetan jarrita, ikasleek espazio komunetan euskaraz oso ongi hitz egin zuten. Poster dinamikaren abantaila da talde bakoitzak posterra hainbat aldiz azaldu behar dietela klasekide-taldeei, eta horrela, urduritasuna gainditu eta konfiantzaz hitz egin ahal izan dute euskaraz, egin duten lanari buruz. Era berean, euskaraz maiz egiten duten ikasleek normalean euskaraz egiten ez duten beren klasekideekin gertutasunez hitz egiteko aukera izan dute, egindako lanari buruzko argibideak eskatzeko. 

Nora Salbotx eta Mitxel Elortza, bi hizlariak bikainak izan dira, beren diskurtsoa 1. mailako ikasleen jakintza, interes eta arreta-gaitasunera egokitu dutelarik. Oso mezu indartsua eman diete, bai jolasen garrantziari buruz, bai euskararen erabileraren inguruan.

Guztira, 150 ikasle inguruk hartu dute parte ekitaldi osoan zehar. Horrez gain, erakusketarako sortutako posterrek abenduko oporrak iritsi arte korridoreetan jarraituko dute. Hau garrantzi handikoa da, poster aurretik pasatzen direnean, harrotasunez ikusten dituztelako. Aldi berean, zuzenean parte hartu ez duten fakultateko ikasle eta irakasleek ere, posterrak ikus ditzakete. Nolabait, ikastetxeko hizkuntz paisaian eragitea ere lortu dugu hilabete honetan zehar.

 

Ekitaldiaren balorazioa datorren abenduaren 17an egingo dugu, klasean. Hala ere, ausartuko naiz aurreratzen ekitaldiak ondo bete zituela bere helburuak eta oso ikaskuntza baliotsua izan dela ikasleentzat. Mila esker!

Topaketa: Euskaraz Jolasten Lehen Hezkuntzan, 2024ko abenduaren 3an

Nola eralda dezakegu jolasgaraia, aktiboa, anitza, kulturalki aberatsa eta euskaldunagoa izateko? 

Galdera honetatik abiatu genuen ikasturte hau, Lehen Hezkuntzako graduko 1. mailako ikasleekin.

Urtero bezala, Komunikazio Gaitasunaren Garapena I irakasgaian topaketak antolatu ditugu, ikasleak eremu akademiko-zientifikoan murgiltzeko eta hezkuntzaren eremu profesionala ezagutzen hasteko. 

Aurtengo proiektuan, jolasak eta jokoak hartu ditugu aitzakia gisa ahozkotasuna lantzeko, hezkuntzaz gehiago jakiteko, gure jakintzak aktibatzeko eta iturri bibliografikoak erabiltzen ikasteko.

Hau guztia euskararen sustapenarekin lotu dugunez, topaketa hau ABENDUAREN 3AN egitea erabaki dugu, EUSKARAREN EGUNEAN, hain zuzen ere.

Topaketa irekia da, edonork har dezake parte, eta bi atal nagusi izango ditu:

• Hitzaldi edo solasaldiak
• Poster erakusketa azalduak

 

EGITARAUA

NON: Hezkuntza eta Kirol Fakultatea (UPV/EHU). Gasteiz, Juan Ibáñez de Sto. Domingo, 1, 01006.

NOIZ: Abenduak 3, 15:00etatik 19:00etara

*HITZALDIAK bi aldiz eskainiko dira, bi txandatan. Hitzaldietara soilik etorri nahi izanez gero, gomendagarriena da 16:00-18:00 tartean etortzea. 

2.5 GELA

15:00-15:45 Jolastea eta ikastea bidegurutzean. Nora Salbotx.

16:00-16:45 Jolastea eta ikastea bidegurutzean. Nora Salbotx.

17:00-17:45 Aneren abenturak. Aisialdian euskaraz bizi eta jolas. Mitxel Elortza.

18:00-18:45 Aneren abenturak. Aisialdian euskaraz bizi eta jolas. Mitxel Elortza.

3.4 ETA 2.4 GELAK

15:00-16:45 Poster erakusketa azalduaren 1. txanda

17:00-18:45 Poster erakusketa azalduaren 2. txanda

HIZLARIEI BURUZ

Nora Salbotx Alegria (Iruñea, 1973). 

Magisteritzan eta Psikopedagogian graduatua, Landa Eremuko Hezkuntzan graduondokoa eta Hezkuntza eta Komunikazioan masterra.

Mondragon Unibertsitatean eta Nafarroako Unibertsitate Publikoan irakasle aritutakoa, gaur egun Amaiurko eskolako zuzendaritzan eta Baztango herrietako eskolen koordinazio lanetan ari da. 

Eusko Ikaskuntzako Hezkuntza lantaldeko zuzendarikide, Hik Hasiko aholkulari, Herri Hezitzaileen sareen lagun, Hik Hasi eta Argia aldizkarietako zein Guraso.eus eta Oinherriren web agerkarietako kolaboratzaile. 

Irakasleen formakuntzan aritzen da hizkuntza idatziaren didaktikan eta landa eremuko hezkuntzaren ildoak jorratuz. “Askatu edo Moztu, euskal hezkuntzagintzaren erronka zahar eta berriak” (Iratzar-Txalaparta, 2021) hezkuntzari buruzko entsegu politikoaren egilea. bell hooks-en "Transgresioa irakasgai. Hezkuntza askatasunaren praktika gisa" liburuaren euskarazko edizioaren hitzaurrearen egilea (Katakrak, 2023). Koldo Rabadanen "Superbotereak. 10 urrats eskola eraldatze bidean" liburuaren hitzaurrearen egilea (Argia, 2024). Euskal Hezkuntzagintzan militante.

Mitxel Elortza Exea (Gasteiz, 1988).

Irakasle eta idazlea.

Musika irakasle ikasketak egin zituen Euskal Herriko Unibertsitate Publikoan. 

Irakaskuntza munduan haurrekin lan egiteak euren beharrizanak hobeto ezagutzeko aukera eman dio, eta irakurketa-idazketaren irakaskuntzan buru belarri ibiltzeak haur literaturako ipuinak idazten hastera animatu zuen. 

Horrez gain, Zabalganako Euskara Taldea (ZET) Gasteizko auzoko euskara taldean eta eskolako euskara taldean euskararen alde lanean dabil. 

 

POSTER ERAKUSKETARI BURUZ

LEHEN TXANDA: 15:00-16:50

1. JOKOAK ETA LEHIAKORTASUNA. Sergio Lizarduy, Sergio Garate, Iñaki Ormaetxea, Mikel Samaniego eta Hodei Gastaminza
2. ANTZERKI ETA DRAMA JOLASAK. Ainhoa De Luz, Itziar Hernández, Fatima El Ghoufairi, Nora Berasaluze, Aicha Hamideddine eta Xabier Duran
3. JOLAS SINBOLIKOAK. Iria Arroyo, Naia Ares, Unai Alba, Nerea Barrio, Paula Ben eta Laida García
4. SUGEAK, AZERIAK ETA OILOAK. Laura Domínguez, Sheila Balebona, Naroa García, Ainhoa Gutiérrez, Judith Gamazo, Lierni De La Cruz, Araitz Altuna, Naroa Fernández eta Maddi Barriola
5. MAHAI-JOKOAK. Janire Garrido, Vega Gómez de Segura, Ainara Gorriño, Rosa Romero, Paula Ochoa de Retana eta Amaia Goiri
6. ADINARI EGOKITUTAKO JOLASAK. Endika Merchan, Imanol Prieto, Jon Imaz, Elur Urkola, Peio Olabarrieta, Asier Velasco, Ortzi Larrañaga, Liher Ortiz de Zarate, Haritz Mujika eta Lucía Zubizarreta
7. MAHAI-JOKOAK. Andoni Okariz, Izaskun Sierra, Ane Tamayo, Gorka Sánchez, Sergio Rituerto, Paula Tapia, Uxue Hierro eta Aroa Veiga
8. HERRI-JOLASAK. Gartzen Txurruka, Markel Ramón, Martina López, Maialen Ortiz de Apodaca, Aitor Sáez de Cámara, Gaizka Sanchotena, Iker Varona, Garazi Regil, Iraia Uriarte eta Naroa Ortiz de Landaluce
9. KANPOAN EGITEN DIREN JOLASAK. María Manzanos, Maider Ibáñez, Nekane Camarero, Ibon Azpiri eta Izan Velasco
10. LUDOPATIA. Mikel Martín, Aratz Martínez, Oier Biain, Oinatz Eizagirre, Ortzi Bahillo, Josu Sáez, Sergio Arribas eta Markel Berridi

BIGARREN TXANDA: 17:00-18:50

1. GENERO BERDINTASUNA JOLASETAN. Mikel Yanguas, Eneko López, Asier Palacios, Ibai Merino, Iker Sanz, Ekai Ortuondo, Unax Sánchez, Aritz Saizar eta Beñat Martínez de Albeniz
2. MUSIKARI LOTUTAKO JOLASAK. Laia Igerategi, Mirari Espilla, Imanol Gabilondo, Peio Barcala, Manex Jainaga, Ibon Ibarra, Ibon Arreskurrinaga, Paule Ereño, Malen Aguirre, Unai Arrizabalaga, Julen Chamosa eta Iñaki Artazcoz
3. TALDEKAKO JOLAS MOTOREAK. Asier Gorrotxategi, Iker Herrero, Unai Biain, Yeray Casado, Egoitz González de Langarica, Xabier Gurbindo, Alazne Ciarsolo, Garazi Díaz de Espada, Markel Hierro, Ibai Chamorro eta Enara Goñi
4. KARTA-JOKOAK. Uxue Ibaibarriaga, David Bejarano, Dani Delgado, Eneko García eta Aroa Domínguez
5. JOLAS PSIKOMOTORRAK. Markel Meñaka, Oihan López de Luzuriaga, Sabrina Sánchez, Claudia López, Ainara Hurtado eta Ander Olave
6. ESKU JOLASAK. Ekhine Unzalu, Leire Mendinueta, Yanaba Ruiz, Ainhoa Ramírez, Nerea Pérez, Asier Sánchez, Ane Miguel eta Malen Ulazia
7. ZENTZUMEN JOLASAK. Alaitz Asurmendi, Naroa Aramendia, Dani Cabezas, Marla Regil, Garazi Mujika, June Collado, Maddi Saenz de Samaniego, Izaskun Landa, Aitzol Díaz de Durana eta Alaitz Salgado
8. ERRITMO JOLASAK. Julen Otegui, Olatz Ochoa de Eribe, Irene Calleja, Maialen Achaerandio eta Odei Sánchez
9. JOLAS PSIKOMOTORRAK. Sara Valderrama, Uxue Altuna, Amets Rodríguez, Intza Orobengoa, Oihane Zuluaga, Haimar Galarraga, Aitor Amondarain, Aitor Arrillaga, Danel Pita eta Nahikari Osa

ANTOLATZAILEAK

UPV/EHUko Hezkuntza eta Kirol Fakultateko Lehen Hezkuntzako graduko 1. mailako ikasleak.

Ainhoa Ezeiza irakaslea (Komunikazio Gaitasunaren Garapena Lehen Hezkuntzan I irakasgaiaren baitan).

Harremanetarako: ainhoa.ezeiza@ehu.eus

BABESLEAK

Hizkuntzaren eta Literaturaren Didaktika Saila (UPV/EHU)

Hezkuntza eta Kirol Fakultatea (UPV/EHU)

Euskara, Kultura eta Nazioartekotzearen arloko Errektoreordetza (UPV/EHU)

 

 

Ahozko historien mintegia, 2024ko azaroan

 

Kulturartekotasun minorreko "Fundamentos de la educación multicultural" irakasgaian, ahozko historien inguruko saio ireki hauek antolatu ditugu, interesa duen edonor hurbiltzeko.

2024ko azaroaren 19, 22 eta 25ean, ahozko historien inguruko mintegia landuko dugu Gasteizko Hezkuntza eta Kirol Fakultatean (Juan Ibáñez de Sto. Domingo, 1), Hizkuntza Gelan (beheko solairua).

• Mintegia gaztelaniaz izango bada ere, euskaraz parte hartu ahal izango da.
• Ez da beharrezkoa saio guztietara etortzea. Saio bakoitza modu autonomoan planteatu da.
• Mintegia doakoa da.

Azaroak 19, 8:30-10:00

Zer dira ahozko historiak? Dinamizatzailea: Ainhoa Ezeiza. Hizkuntzaren eta Literaturaren Didaktika Saileko irakasle-ikertzailea.

Azaroak 22, 9:00-12:00

Ahozko historien tailerra. Nola egiten dira?

Dinamizatzailea: Javier Encina. UNILCO-espacio nómada, Ilusionista Sozialen Kolektiboa.

Azaroak 25, 10:30-11:30

Ahozko historiak Altzan (Gipuzkoa): eskola eta komunitatea elkarlotzen. Dinamizatzailea: Nahia Delgado de Frutos. Didaktika eta Eskola Antolamendu Saileko irakasle-ikertzailea.

ZER DIRA AHOZKO HISTORIAK?

Guk lantzen ditugun moduan, ahozko historiak eguneroko bizitzaren autogestioa eraikitzeko bizikidetza-tresnak dira.

Prozesu horretan, ahozko historiak mundu-ikuskerak eraikitzeko garraiatzaileak dira, pentsatu/sentitu/egiteko eta erlazionatzeko moduak kontatzeko tresnak. Euren ezaugarri nagusia da eguneroko bizitzatik abiatzen den eraldaketa bultzatzen laguntzen dutela.

Ahozko historien bidez, komunitatearen eta eskolaren arteko zubiak eraiki ditzakegu.

Gehiago jakiteko: http://historiasorales.org/

Mintegian landuko ditugun material kontzeptual-akademikoak:

• Delgado, N., Uranga, I., Encina, J. eta Ezeiza, A. (2019). Historias orales en Educación Infantil y Primaria. In A. Ezeiza eta J. Encina (koord.), Trabajando la lengua desde una perspectiva dialéctica (273-289. orr.). ISM-UPV/EHU. https://ilusionismosocial.org/pluginfile.php/4586/mod_resource/content/2/historiasorales_infantiyprimaria.pdf
• Encina, J. eta Ezeiza, A. (2020). Historias orales como herramienta para la convivencialidad. Revista Latinoamericana Estudios De La Paz Y El Conflicto, 1(2), 13–38. https://doi.org/10.5377/rlpc.v1i2.9828

 

María Galindo aktibista feminista boliviarra: "Boterearen aurrean ez duzu ahaldundu behar, matxinatu egin behar duzu"

María Galindo aktibista feminista boliviarraren parte-hartzea, Espainiar Gobernuaren Berdintasun Ministerioak antolatutako Nazioarteko Topaketa Feministan, ‘We call it feminism. Feminismo para un mundo mejor’ lelopean (5/03/2023)

 

Hemen argitaratua: https://ctxt.es/es/20230301/Firmas/42263/Maria-Galindo-feminismo-revolucion-poder-derechos-humanos-dominacion.htm Creative Commons Attribution-NonCommercial 4.0 International lizentziapean eta neuk itzulia (iradokizunak eta zuzenketak oso ongietorriak izango dira).

 

María Galindo bere parte-hartzean, mahaira igota. Argazkiaren egilea: Suiry Sobrino (Twitterren argitaratua: @suignris). ElSaltoTV-n ikus dezakezu bere hitzaldi osoa: https://youtu.be/5aZbCG3WAb0

Boto-eskubidea ematen dizuet politikatzat jotzen denaren birdefinizio erradikalerako eskubidearen truke.

Berdintasunezko ezkontzarako eskubidea ematen dizuet ezkontza indargabetzearen truke.

Kode penalean feminizidioa erregistratzeko eskubidea ematen dizuet erailak ez izateko eskubidearen truke.

Eta hauxe iradokitzen dizuet: pertsonen salerosketak kezkatzen bazaituzte, hemen bertan zaudeten emakume espainiar eta europarrei bereziki, borroka zaitezte Atzerritarren Legearen indargabetzearen alde, eta ez sexu-langileen kriminalizazioaren alde. Ez dadila izan borroka hori zuen sistema politiko nazionaletan ezin delako egin, gauza hauek ez baitira hemen erabakitzen.

Hitzaurre hau ez da erretorikoa, geure buruari azpikeriaz honakoa galdetzeko deia baizik: zer egin? Ez zer egin eskubideekin, baizik eta zer egin politikarekin.

Egin didazuen gonbidapena eskertzen dut, hemen nago ezin dudalako hitz egiteko inolako espaziorik gaitzetsi, mundu-mapan existitzen ez den herrialde batetik bainator, herrialde bat zeinetan, gainera, paria hutsa naizen eta nire lana etengabeko polemika eta jazarpenetara mugatua dagoen.

Ezin dut ukatu gonbidapenak harritu nauela, Ministerio batetik datorrelarik.

Giza Eskubideen mahai honetan lekuz kanpo sentitzen naiz.

Nire lana ez da Giza Eskubide deitutakoen baitan sartzen.

Eta hori esan bitartean, galdera hau datorkit burura, zeri deritzote Giza Eskubide?

Giza Eskubide askotan borroka arriskutsu eta subertsiboei deitzen zaie, duten indarragatik ezabatu ezin dituzten borrokei, baina baita ezarritako ordena sozialarentzat arriskutsutzat jotzen dituzten borrokei ere, nahiago dute horiek guztiak giza eskubideen aldeko borrokatzat sailkatu.

Nahiago dute borroka horiek saritu eta otzandu. Giza Eskubideen etiketa jarrita, saiatzen dira despolitizatzen, leuntzen eta beren benetako eremutik jaurtitzen, hau da, politikaren sustrai eta era berrien asmakuntzaren eremutik.

Nire lanbidea ez da giza eskubideen aldeko borroka, praktika politika feminista masiboen asmakuntza baizik, behetik eta estatutik kanpo, eta enpatia sozial antifaxista erraldoia eraikitzeko indarra dutenak. Horretan aritzen naiz, eta hori da goitik behera lokazten nauena, baina baita nire herrialdean oinatz historikoa urratzea ahalbidetzen nauena ere.

Gizarte oso batekin elkar ulertzeko gaitasuna dut. Itxaropenak batzen noa estatuak eta alderdi politikoek gutxiesten dituzten oso gauza txiki eta zehatzen alde borrokatuz. Beraientzat txikikeria direnak nik politika zehatz izena jarri diet.

Nire ustez, feminismoak eskubideen aldeko borroka gisa ulertzea tranpa hutsa da, agortutako amarrua, eta ez dugu bertan erori behar.

Kontua ez da Giza Eskubideei emakumeen eskubideak falta zaizkiela osatzeko.

Kontua ez da, intersekzionalitate ikuspegitik, emakumeen eskubideei unibertso zuri heterosexualetik kanporatutako emakumeen eskubideak falta zaizkiela.

Arazoa ez da sexu langileen, etxe langileen, edo gaizki deituriko migranteen eskubideak falta direla. Migranteak ekonomia neoliberaletatik erbesteratutako emakumeak baino ez dira, lanik ez egotearen ondorioz. Migranteak euren lurraldeetatik kanporatutako emakumeak baino ez dira, arpilatze ekozidaren ondorioz ihes egin beste aukerarik ez dutelarik.

Arazoa ez da Giza Eskubideei eskubideak gehitzea, gizatiarragoak izan daitezen.

Eskubideak gai-zerrendan gehitzea, sektorez sektore eta unibertsoz unibertso, kontakizun epiko bat baino ez da, Estatuek eskubideak banatu edo zabal ditzaten borrokatzea, denbora historikoa, bizi-energia, sormen politikoa eta gaitasunak galtzea da, eta ezin ditugu galdu, presazkoa baita beste proiektu batean eta beste leku batean erabiltzea.

Eta, hori guztia gutxi balitz bezala, eskubideei buruz hizketan segitzea jendea aspertzea da, eta gizartearen gogogabezia orokorra eragiteaz konplize izatea, horrek guztiak ilusio mobilizatzaileak desagertzea dakar eta.

 

Ez dago politikarik, politikaren pribatizazioa baizik.

 

Ez dago demokraziarik, matxokrazia baizik.

 

Ez dago demokraziarik, botoaren bidez ezer erabakitzen ez den zabor-demokrazia baizik.

 

Ez dago hauteskunderik, hauteskunde-marketineko agertokiak baizik.

 

Ez daude nazio estatu subiranurik, estatuak menpean dituen proiektu supraestatal kolonial kapitalista baizik, zeinetan gobernuak administratzaile hutsak diren.

 

Horrexegatik hitz egin behar da politikaz eta ez eskubideez.

 

Baina eskubideez hitz egin nahi badute, esan behar da erretorikoak direla, ez delako gauza bera enuntziatzea eta jardutea.

Eskubideez hitz egin nahi badute, esan behar da eztabaida xantaiagilea dela: ematen dizkizut, kentzen dizkizut, edo murrizten dizkizut eta mozten.

Eskubideak ematen badizkizute, ezin duzu emailearen egitura sistemikoa zalantzan jarri. Eskubideek sisteman bezeroaren lekuan kokatzen zaituztelako, eta ez subjektuarenean.

Eskubideez hitz egin nahi badute, esan behar da lehentasun eta garrantziaren arabera segmentatzen direla, eta iladan azkenak gaudenok, geureen zain, nekatuak gaudela horrenbesteko atzeratze historikoarekin.

Eskubideez hitz egin nahi badute, esan behar da kapitalismoak geure gorputzen gaineko subiranotasuna kendu digula, eta hortaz, galdutakoa berreskuratzeaz hitz egin beharko genuke eta ez ezer berria lortzeaz.

Falta diren eskubideak ez dira arazo, arazoa eskubideen definizioa bera da, beren unibertsaltasun asmoa mundu pluribertsal honetan.

Ez sinetsi sartu nahi diguten ziria: unibertsalak ez du, inolaz ere, esan nahi gizon* eta emakume* guztiontzat direla.

Unibertsalak esan nahi du europar, inperial, kolonial eta zibilizazio-matrize bakarrekoa, hau da, gizarte-eredu eta demokrazia-eredu bakarrekoa, obeditu eta kopiatu beharrekoa.

Giza Eskubideak ez dira, bada, neurri koloniala hartzeko tresna ere!

Horregatik kritika daitezke Maduro eta Ortega, –oso ondo dago, bestalde, eurak salatzea eta kritikatzea–, baina ezin da kritikatu Israelek edo AEBk egiten dutena.

Europan, edo europar estatuek urratutako giza eskubideak ez dira ankerkeriatzat hartzen, ez dira sartzen eskubide-hausteen zenbakietan. Ezin dira salatu diktadura arrazista, diktadura kapitalista edo diktadura estraktibista ekozida gisa.

Hemen arazoa Giza Eskubideen jabeak dira, eta gizakitzat hartzen dutena animaliatzat hartzen dutenarekiko, zilegitzat eta duitzat jotzen dutena alboko kaltetzat jotzen dutenarekiko.

Europan gaude, hobi komun bilakatu den Mediterraneo itsasoan. XVI. mendean egin zuten bezala, gizaki egoera lapurtzen zaie giza-masa bihurtzeko, ezer esatera inor edo inor gutxi ausartzen delarik, kriminalizatua ez izateko, Helena Malenori gertatu zaion bezala, itsasoan jendearen bizitza salbatzen saiatzeagatik pertsonen salmentaz akusatuta.

Giza Eskubideen erakundeen diskurtsoa maltzurra da, heriotza estaltzeko maskara bat, ezinbesteko hipokresia inor ausar ez dadin benetan egiten ari direnaren kontzientzia hartzera.

Perun jendea hiltzen ari dira eta hori ez da gobernagarritasun ezaren arazo nazionala, baizik eta munduko ordena kolonialak bere bidea segitzeko modua, eta heriotza horiek eskualde osoan baliagarriak dira lehengaiak erauzten segitzeko estatu alemaniar, txinatar, errusiar edo iparramerikarren agindupean. Agindu horietan, espainiar estatua diskoteka sarrerako segurtasun-guardaren lana betetzen ari da.

Arazoa ez dira eskubideak, mundu eta proiektu politikoak baizik.

 

Hemen lekuz kanpo nago.

Ajimin usaina dut.

Nire pasaporteak kokaina usaina du, legez kanpoko sustantzia Kolonbia, Mexiko edo Bolibian horrek narkoguda odoltsua eragin diguna eta zeinaren konponketa posible bakarra drogen legeztatzea eta koka hostoaren zigorgabetzea den, hain zuzen ere eztabaidatu nahi ez dutena, gure heriotzek ez dutelako baliorik Giza Eskubideen urratzeen kontabilitatean.

Litio usaina dut.

Su emandako Amazoniaren usaina dut.

XVI. mendeko urre eta zilar usaina oraindik ez zait gainetik kendu.

Hemen lekuz kanpo nago.

Ez dut Genevan lobby-a egin nahi, X, J edo P-ren eskubideen alde.

Ez dut Giza Eskubideen jabeekin audientzia bilatu nahi gizakiak garela esateko, Boliviatik, Haititik edo gizakitzat jotzen direnen mapatik ezabatutako beste edozein lekutatik etorri garen arren.

Ez dut nahi nire hirugarren munduko lesbianismoaz harrotu daitezen eta nazioarteko laguntza eman diezadaten, hau da, zapladatxoak bizkarrean zibilizatuagoak senti daitezen.

Nire lana proiektu despatriarkalizatzaile, antikapitalista eta antikolonial bat pentsatzea eta eraikitzea da, eskubideen diskurtsoa erabat gaindituko duena, eskubide horiek emakumeenak, animalienak, transenak zein marikenak izan.

 

Posible denaren ikuspegia galdu izana leporatuko didate.

 

Nik beraiei leporatzen diet aspertu egin nautela.

 

Barka gaiaren begirunea horrela galtzeagatik.

 

Hizkuntza berean ari garela dioten arren, ez du ematen elkar ulertzen ari garenik.

 

Eman didaten hamar minutu eskaseko tarte honetan hori da esan ahal dizuedan guztia.

 

Amaitzeko, eskari bat: Giza Eskubideen Nazioarteko Itunari izena aldatzea nahi nuke.

Eskatuko nuke honela izendatzea: Europarrek Gizakitzat jotzen dituztenen Eskubideen Itun Erretorikoa.

 

Proiektua ez da boterea hartzea.

 

Boterearen aurrean ez duzu ahaldundu behar.

 

Boterearen aurrean matxinatu egin behar duzu.

 

Proiektua iraultza egitea da.

 

Eskerrik asko.

Ilusionista Sozialen Nazioarteko Mintegia, 2022ko urriaren 3an

NOIZ
2022, urriaren 3a

NON
Hezkuntza eta Kirol Fakultatea, Irakasletza eraikina (UPV/EHU)
Juan Ibáñez de Sto. Domingo k/ 1 (Gasteiz)

GELA
3.4 gela, 3. solairua

EGITARAUA
10:30-12:30 Unibertsitatea, zientzia eta komunitatea

• Programa "Ciencia y Sociedad"  de la UNAM (México años 70). Sinaí Rivera Martínez.
• "Serviço Cívico Estudantil" Michel Giacomettiren proposamena Portugalgo Iraultzaren ostean. Ainhoa Ezeiza.
• Debatea

17:30-20:00 Hezkuntza eta komunitatea

• Altzako ahozko historiak ikas-materialak sortzeko. Nahia Delgado de Frutos.
• Educación Común en Iztapalapa (Ciudad de México). Sinaí Rivera Martínez.
• Debatea

SARRERA LIBRE ETA DOAKOA
Ez da beharrezkoa saio guztietara etortzea. Etortzen zaren saioen bertaratze egiaztagiria eska dezakezu.

HARREMANETARAKO
ainhoa.ezeiza@ehu.eus

+INFO
www.ehu.eus/ism

AURKEZPENA

Gure ikertaldean hilabete hauetan Sinaí Rivera Martínez ikertzaile mexikarraren bisita dugula aprobetxatuz, jardunaldi hauetan bere hiru ikergunetan sakonduko dugu: unibertsitatea, hezkuntza eta komunitatea.

Alde batetik, unibertsitatea eta zientziaren garapena loturik daudelarik, eztabaida proposatzen dugu unibertsitatearen alderdi kritikoen inguruan. Horretarako, atzera begirada egingo dugu eta bi esperientzia unibertsitarioren inguruan hitz egingo dugu:

• "Programa Ciencia y Sociedad" izeneko programa sortu zuen taldea, Mexikoko Unibertsitate Nazional Autonomoan 70. hamarkadan. Sinaí Rivera ikertzailea tesia horren inguruan garatzen ari da, eta talde honek zientziaren ikuspegi kritikoa sustatu zuen, garai hartako krisi politiko, sozial, ekonomiko eta ekologikoaren aurrean.
• Portugalgo Klabelinen Iraultzaren ostean (1974ko apirilaren 25ean), besteak beste "ikasle brigadak" antolatu zituzten, unibertsitatearen demokratizazio masiboari erantzuteko eta unibertsitatea "herriarekin" lotzeko. Bereziki interesatzen zaizkigu Michel Giacometti ikertzaileak tutorizatutako brigadak, jakintza herrikoiekin topatzean (talka egitean) gertatutakoaz sakontzeko. Gezurra badirudi ere, oso gutxi dakigu Portugalgo iraultza horren eta ondorengoen inguruan.

Beste aldetik, ohikoak dira hezkuntza eta komunitatea elkarlotu behar direlako diskurtsoak, baina gutxitan planteatzen da eraikitze kolektiboaren ikuspegitik. Eskola eta hezkuntza zentrifugoaren ideian sakontzen laguntzeko bi esperientzia hauek aurkeztuko ditugu:

• Donostiako Altza auzoan ahozko historiak landu dira, komunitate dinamizazioa sustatzeko. Ahozko historia horietan oinarrituz, ikas-material digitalak sortu ditu Nahia Delgado de Frutos ikertzaileak, jakintza herrikoien hezkuntza-balioa azpimarratzeko. Bere tesi doktoralaren nondik norakoak argituko dizkigu eta, batez ere, ikas-materialen adibideak erakutsiko ditu.
• Aldi berean, Mexiko Hiriko Iztapalapa kolonian, UACM unibertsitateko EDCO (Educación Común) taldeak komunitateko beste ikasgune batzuekin elkarturik, hainbat ekimen gauzatu ditu, bizikidetza dinamizatzeko. Horietako batzuetan hartu du parte Sinaí Rivera Martínez ikertzaileak, eta saio honetan horietako zenbait azalduko dizkigu.

 

HIZLARIEI BURUZ

SINAÍ RIVERA MARTÍNEZ Mexikoko CINVESTAV- IPN (Instituto Politécnico Nacional) ikerketa-zentruko doktoregoko ikaslea da. Universidad Pública Nacional (UPN) unibertsitateko irakasle izandakoa, askotariko proiektu eta mugimenduetan hartu du parte: UACMko EDCO (Educación Común, lehenago LaTicFM), UNISUR Hegoaldeko Herrien Unibertsitateko irakaslea, Mujeres y la Sexta mugimendua, eta abar.

NAHIA DELGADO DE FRUTOS Euskal Herriko Unibertsitateko Psikodidaktika doktoregoko ikaslea da, Didaktika eta Eskola Antolakuntza Sailean, tesia defendatzear duelarik. Horrez gain, Globernance Gobernantza Demokratikoaren Institutuko ikertzailea da. UPV/EHUko irakasle izandakoa, Berrikuntza Didaktiko-metodologikoko Proiektuen Garapena eta Kudeaketa Hezkuntza Erakundeetan Unibertsitate Masterra du eta ikas-materialgintza digitalean hainbat esperientzia gauzatu ditu, Gipuzkoako Foru Aldundiarekin lankidetzan, besteak beste.

AINHOA EZEIZA ISM ikerketa eta formakzio taldeko ikertzaile nagusia da. Psikodidaktikan doktore, UPV/EHUko Hizkuntzaren eta Literaturaren Didaktika Saileko irakasle-ikertzaile agregatua da Hezkuntza eta Kirol Fakultatean. Esperientzia luzea du irakasleen formakzioan, bai unibertsitatean, bai bestelako esparruetan. Hainbat ikerketa-proiektutan lan egin ostean, gaur egungo lan-lerro nagusia jakintza herrikoiak eta ezagutza zientifikoa elkarlotzeari lotutakoa da, bai ikuspegi komunikatibotik, bai hezitzailetik abiatuta.

Osasunaren autogestio kolektiboa Gasteizko Topaketa Libertarioetan

Irailaren 16tik 19ra bitartean, Gasteizen Topaketa Libertarioak egingo dira, eta gure irratiak bertan parte hartuko du hizlari gisa ostegunean, Zapateneon egingo den solasaldian. 

Osasunaren autogestio kolektiboaren inguruan ariko gara Javier Encina eta Ainhoa Ezeiza ilusionista sozial eta Alegría Libertaria online irrati libreko esatariok. Horretarako, 2018an argitaratu genuen liburua hartuko dugu oinarritzat.

Liburua esteka honetan deskarga dezakezue:

http://volapukediciones.blogspot.com/2020/03/autogestion-cotidiana-de-la-salud-libre.html

 Bideo hau prestatu dugu, eztabaidatzen lagunduko duelakoan:

Hona topaketen inguruko informazio osatua:

 Iragarkia, audio formatuan

Eta egitarau osoa, audio formatuan

Ea bertan ikusten dugun elkar!

Ahozkotasuna dinamizatzen hezkuntza erakundeetan: mintegiko bideoak

Aurreko astean, otsailak 17, UPV/EHUko Hizkuntzategiak antolatutako lehen mintegian ahozkotasuna izan genuen hizpide.  

Mintegiaren izenburua: Ahozkotasuna dinamizatzen hezkuntza erakundeetan  

Mintegia UPV/EHUko Blackboard Collaborate plataformaren bitartez egin genuen eta saioa grabatua izan zen. Hala ere, bi orduko bideo bat igotzeak zentzu handirik ez duelarik, eta hasiera partean arazo tekniko bat izan genuenez, pentsatu dut lagungarriagoa izango dela bideoa editatu eta zatika argitaratzea.  

Erreprodukzio-zerrenda osoa, saioa jarraian ikusteko 

Euskarri gisa erabilitako aurkezpena deskargatzeko  

Mintegi honen inguruko informazio gehiago blog honetan  

Lehen zatia: Ahozkotasuna zer da?

Bigarren zatia: Ahozkotasunaren gramatika

Hirugarren zatia: Idatzizkotasunak ahozkotasuna itotzen ote du?

Laugarren zatia: Kultura motak: kultura instituzionala, masa-kultura, kultura alternatiboa(k) eta kultura herrikoiak

Bosgarren zatia: Ahozkotasuna nola dinamizatu?

Hemen dituzue aurkezpenean erabilitako diapositibak: 

Ahozkotasuna dinamizatzen hezkuntza erakundeetan from Ainhoa Ezeiza

 

Aurkezpenaren ondoren, eztabaida txiki bat izan genuen eta hori izan zen mintegiaren bigarren zatira hurbiltzeko aitzakia eta trantsizioa. Zoritxarrez, partaideen ahotsak ez dira ondo entzuten eta ez dute kalitate minimoa argitaratuak izateko. 

Mintegiaren bigarren atalean, 2021-2022 ikasturtean abiatuko dugun ikerketa aurkeztu eta komentatu genuen, ikerketa zirriborratzen hasi aurretik. Ikerketa honen berri datozen egunotan emango dut blog honetan, proiektuaren nondik norako nagusiak idatziz eratzen ditudanean.